Филармонийн 48 дахь улирлын тоглолтын хуваарь

Нийтэлсэн: Javkhlan 2019-10-28 14:55:00

Улсын филармонийн симфони найрал хөгжимчид “Дэлхийн шилдэг удиртгал хөгжим” тоглолтыг   ирэх сарын 1-ний үдэш өөрийн байрандаа үзэгч олондоо хүргэх гэж байна. Үзэгч, сонсогчдынх нь хүсэн хүлээдэг, захиалдаг тоглолтын нэгд зүй ёсоор тооцох уг тоглолтын хөтөлбөрийг харахад шинэлэг, зоримог сонголт бүхий аж. Манай улсад тоглож байгаагүй дууриудын удиртгал хөгжим анхаарал татаж байна. Тухайлбал, Монголын үзэгчдийн хэдийний танил Чехийн алдарт хөгжмийн зохиолч Бедржих Сметанагийн “Худалдагдсан бэр” хэмээх хошин дуурийн удиртгал сонирхолтой. Английн соён гэгээрүүлэгч В.Шекспирийн “Гамлет” бүтээл хэдэн зууны турш хэдэн янзаар дүрээ хувиргасан гэх вэ. Оросын суут хөгжмийн зохиолч П.И.Чайковский уг зохиолын агуулгаас сэдэвлэн “Гамлет удиртгал, уран сэтгэмж” хэмээх хөгжим бичсэн нь алдаршсан.

Гуниг гутрал, гашуудлын цаана ч гоо сайхан нуугдаж байдаг гэдгийг түүний хөгжмөөс мэдэрч болдог. Дэлхийн дуурийн урлагийн аасуудын нэг, Германы “жинхэнэ сонгодог” хэмээдэг Р.Вагнерын цуутай бүтээл “Лоенгрин” дуурийнх нь удиртгал хөгжмийг монгол үзэгчид Филармонийнхоо танхимд анх удаа сонсох нь. Италийн дуурийн урлагийн мастер Ж.Россинийн “Вельгельм Телл”, мөн Германы үндэсний бахархлуудын нэг Ф.Менделсоны “Бартольди”, Францын нэрт хөгжмийн зохиолч Ж.Оффенбахын ‘Oрфейн там’ удиртгалыг ч энэ үдэш үзэгчид гойд таалан сонсох болно. Удиртгал хөгжмүүдийн тоглолтыг хөгжим судлаач Х.Ариунаа тайлбарлаж хүргэнэ. Улсын филармонийн хамт олон уран бүтээлийн 48 дахь улирлын нээлтээ хийхийн өмнө үзэгчдийнхээ хүсэлтээр ийм нэгэн онцгой тоглолт өргөн барих гэж байна.