УИХ-ын ээлжит чуулган 50-иас доошгүй ажлын өдөр хуралддаг байлаа. Харин 2019 онд УИХ Үндсэн хуульд өөрчлөлт оруулахдаа 75-аас доошгүй ажлыг өдөр хуралддаг байхаар өөрчилсөн юм. Тодруулбал, УИХ-ын тухай хуулийн 18.1-д "Улсын Их Хурлын намрын ээлжит чуулган 10 дугаар сарын 01-ний өдрөөс, хаврын ээлжит чуулган 3 дугаар сарын 15-ны өдрөөс тус тус эхлэн 75-аас доошгүй ажлын өдөр чуулна" хэмээн заасан. Үүнтэй холбоотойгоор дөрөвдүгээр жил бүрийн 1-нд нээлтээ хийдэг байсан УИХ-ын хаврын чуулганыг гуравдугаар сарын 15-д нээдэг болсон юм. Энэ удаагийн хаврын чуулган энэ сард завсарлах болзлоо хангаж 75 хоногоо гүйцээх юм. Зургаадугаар сарын 29 нь УИХ-ын хаврын чуулганы 75 дахь ажлын өдөр юм байна. Тиймээс УИХ энэ сарын 30-ны баасан гаригт хаврын чуулганаа завсарлуулах боломжтой. Эсвэл долоодугаар сарын 7-ны баасан гариг хүртэл хуралдах биз ээ. 

УИХ-ын сонгуулийн тухай хуулийг энэ сарын 23-наас өмнө батална

УИХ хаврын чуулганаа завсарлуулахаас өмнө хэлэлцэх шаардлагатай буюу хуулийн хугацаатай нэг хуулийн төсөл бий. Энэ бол УИХ-ын сонгуулийн тухай хууль. Үндсэн хуульд УИХ-ын сонгуулиас өмнөх нэг жилийн хугацаанд сонгуулийн хуульд өөрчлөлт оруулахыг хориглосон заалт бий. Үүний дагуу УИХ-ын сонгуулийн тухай хуульд энэ сарын 25-ны дотор өөрчлөлт оруулах ёстой. Эрх баригчид УИХ-ын сонгуулийн тухай хуулийг 23-ны баасан гаригт багтаан батлахаар төлөвлөжээ.

УИХ дахь МАН-ын бүлэг өчигдөр хаврын чуулган завсарлахаас өмнө хэлэлцэх шаардлагатай хуулийн төслүүдийн талаар гишүүдийнхээ байр суурийг нэгтгэсэн байна. Энэ талаар тус бүлгийн дэд дарга М.Оюунчимэг хэлэхдээ "МАН-ын бүлэг хурлаараа энэ хаврын чуулганаар хэлэлцэх хуулийн төсөл, асуудлуудын талаар ярилцлаа. Хэд хэдэн чухал хуулийн төсөл байгаа. УИХ-ын сонгуулийн тухай хуулийн зургаадугаар сарын 23-наас өмнө батлах учиртай. Тиймээс сонгуулийн тухай хуулиа хэлэлцэж эхэлье гэж ярилцлаа. Мөн Улс төрийн намын тухай хуулийг зайлшгүй хэлэлцэх учиртай. Боловсролын багц хуулийн төслийн хэлэлцэхээр мөн тохирлоо. Нийгмийн даатгалын багц хуулийг бас хаврын чуулганаар хэлэлцэх нь зүйтэй гэдэг дээр бүлэг санал нэгдлээ. Төсвийн тодотголыг Засгийн газраас энэ лхагва гарагт өргөн барина. Тиймээс энэ хуулийн энэ долоо хоногт хэлэлцэж эхэлнэ. Энэ таван хуулийн төслүүдийг хэлэлцэхдээ УИХ-ын гишүүд, байнгын хороод хариуцлагатай хандана гэдэг дээр бүлэг санал нэгдлээ. Эдгээр болон хэд хэдэн хуулийн төслийг энэ удаагийн чуулганаар хэлэлцэхээр тохирлоо" гэсэн юм.

Хаврын чуулганаар 58 хууль, тогтоолын төслийг хэлэлцэхээр төлөвлөсөн юм. Ээлжит чуулган бүрээр ийм олон төсөл хэлэлцэхээр төлөвлөдөг ч хэзээ ч бүгдийг нь хэлэлцэж амждаггүй юм. Энэ удаад ч мөн хэлэлцэж амжихгүй нь.

1. Автотээврийн тухай хуулийн төсөл /Шинэчилсэн найруулга/;
2. Аялал жуулчлалын тухай хуулийн төсөл /Шинэчилсэн найруулга/;
3. Аж ахуйн нэгжийн орлогын албан татварын тухай хуульд нэмэлт оруулах тухай хуулийн төсөл;
4. Байгаль орчныг хамгаалах тухай болон Байгаль орчинд нөлөөлөх байдлын үнэлгээний тухай хуульд нэмэлт, өөрчлөлт оруулах тухай хуулийн төсөл;
5. Байгалийн ургамлын тухай хуулийн төсөл /Шинэчилсэн найруулга/;
6. Байгаль орчны багц хуулийн төсөл;
7. Биеийн тамир, спортын тухай хуульд нэмэлт, өөрчлөлт оруулах тухай хуулийн төсөл;
8. Боловсролын тухай хуульд өөрчлөлт оруулах тухай хуулийн төсөл;
9. Боловсролын ерөнхий хуулийн төсөл;
10. Бооцоот таавар, хонжворт сугалааны тухай хуулийн төсөл;
11. Бооцоот морин уралдааны тухай хуулийн төсөл;
12. Газрын багц хуулийн төсөл;
13. Геодези, зураг зүйн тухай хуулийн төсөл;
14. Гэрийн тэжээвэр амьтны тухай хуулийн төсөл;
15. Гэмт хэрэг, зөрчлөөс урьдчилан сэргийлэх тухай хуульд өөрчлөлт оруулах тухай хуулийн төсөл;
16. Дээд боловсролын тухай хуулийн төсөл;
17. Женев хотноо 1958 онд батлагдсан “Дугуйт тээврийн хэрэгслүүд, тэдгээрт суурилуулан ашиглаж болох тоног төхөөрөмж, эд ангид зориулсан НҮБ-ын уялдуулан тохируулсан техникийн дүрмийг хэрэглэх болон НҮБ-ын эдгээр дүрэмд үндэслэн олгосон баталгааг харилцан хүлээн зөвшөөрөх нөхцөлийн тухай хэлэлцээр”-ийг соёрхон батлах тухай хуулийн төсөл;
18. Жагсаал цуглаан хийх журмын тухай хуульд нэмэлт, өөрчлөлт оруулах тухай хуулийн төсөл;
19. Засгийн газрын тусгай сангийн тухай хуульд өөрчлөлт оруулах тухай хуулийн төсөл болон хамт өргөн мэдүүлсэн Засгийн газрын тусгай сангийн тухай хууль /Шинэчилсэн найруулга/-ийг дагаж мөрдөх журмын тухай хуульд нэмэлт оруулах тухай хуулийн төсөл;
20. Зохицуулах үйлчлэлтэй хүнсний тухай хуульд нэмэлт, өөрчлөлт оруулах тухай хуулийн төсөл;
21. Зөрчлийн тухай хуулийн төсөл /Шинэчилсэн найруулга/;
22. Казиногийн тухай хуулийн төсөл;
23. Монгол Улсын хөгжлийн 2024 оны төлөвлөгөө батлах тухай УИХ-ын тогтоолын төсөл;
24. Монгол Улс, Азийн хөгжлийн банк хоорондын “Аймаг, сумын бүсчилсэн ногоон хөгжлийн хөрөнгө оруулалтын хөтөлбөр”-ийн хэлэлцээр соёрхон батлах тухай хуулийн төсөл;
25. Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуулийн төсөл;
26. Монгол Улсын нэгдсэн төсвийн 2022 оны гүйцэтгэл, Засгийн газрын санхүүгийн нэгтгэсэн тайлан батлах тухай УИХ-ын тогтоолын төсөл;
27. Монгол Улсын иргэн гадаадад хувийн хэргээр зорчих, цагаачлах тухай хуулийн төсөл /Шинэчилсэн найруулга/;
28. Мэргэжлийн болон техникийн боловсрол, сургалтын тухай хуулийн төсөл /Шинэчилсэн найруулга/;
29. Нас барсан өндөр насны тэтгэврийн зээл авагчийн тэтгэврийн зээлийг чөлөөлөх тухай хуулийн төсөл;
30. Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төсөл;
31. Нийгмийн даатгалын ерөнхий хуулийн төсөл;
32. Нийгмийн даатгалын сангаас олгох тэтгэмжийн тухай хуулийн төсөл;
33. Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуулийн төсөл;
34. Нийгмийн даатгалын сангаас олгох тэтгэвэр, тэтгэмжийн тухай хуульд өөрчлөлт оруулах тухай хуулийн төсөл;
35. Олон улсын иргэний нисэхийн тухай Конвенцын 50 дугаар зүйлийн а) хэсэгт нэмэлт, өөрчлөлт оруулах тухай Протоколыг соёрхон батлах тухай хуулийн төсөл;
36. Олон улсын иргэний нисэхийн тухай Конвенцын 56 дугаар зүйлд нэмэлт, өөрчлөлт оруулах тухай Протоколыг соёрхон батлах тухай хуулийн төсөл;
37. Онцгой албан татварын тухай хуульд нэмэлт, өөрчлөлт оруулах тухай хуулийн төсөл;
38. Сургуулийн өмнөх болон ерөнхий боловсролын тухай хуулийн төсөл;
39. Судалгааны их сургуулийн эрх зүйн байдлын тухай хуулийн төсөл;
40. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн төсөл /Шинэчилсэн найруулга/;
41. Төрийн болон орон нутгийн өмчийн тухай хуулийн төсөл /Шинэчилсэн найруулга/;
42. Төрийн болон орон нутгийн өмчит компанийн тухай хуулийн төсөл /Шинэчилсэн найруулга/;
43. Төлбөрийн чадваргүйдлийн тухай хуулийн төсөл /Шинэчилсэн найруулга/;
44. Төмөр замын тээврийн тухай хуулийн төсөл /Шинэчилсэн найруулга/;
45. Төсвийн тухай хуульд нэмэлт, өөрчлөлт оруулах тухай хуулийн төсөл болон УИХ-ын тогтоолын төсөл;
46. Төрийн албан хаагчийн ёс зүйн тухай хуулийн төсөл;
47. Төрөөс төмөр замын талаар баримтлах бодлогын хэрэгжилтийг хангах зарим арга хэмжээний тухай УИХ-ын тогтоолын төсөл;
48. Усны тухай хуульд нэмэлт, өөрчлөлт оруулах тухай хуулийн төсөл;
49. Үл хөдлөх эд хөрөнгийн албан татварын тухай хуульд нэмэлт оруулах тухай хуулийн төсөл;
50. Хамтын тэтгэврийн тухай хуулийн төсөл;
51. Хөгжлийн зорилтот хөтөлбөр батлах тухай УИХ-ын тогтоолын төсөл;
52. Хүүхэд хамгааллын тухай хуульд нэмэлт, өөрчлөлт оруулах хуулийн төсөл;
53. Хөдөлмөр эрхлэлтийг дэмжих тухай хуулийн төсөл /Шинэчилсэн найруулга/;
54. Хөгжлийн бэрхшээлтэй хүний эрхийн тухай хуулийн төсөл /Шинэчилсэн найруулга/;
55. Хүмүүнлэг боловсролыг дэмжих тухай хуулийн төсөл;
56. Хувийн нэмэлт тэтгэврийн тухай хуулийн төсөл;
57. Цэргийн алба хаагчийн тэтгэвэр, тэтгэмжийн тухай хуульд нэмэлт, өөрчлөлт оруулах тухай хуулийн төсөл;
58. Шүүхийн бус журмаар өр барагдуулах үйл ажиллагааг зохицуулах  тухай хуулийн төсөл.